標題: 轉帖：有關侵大學生要求老闆明哥贊助事件 [打印本頁]

---

作者: 逍遙的安少    時間: 2013-3-28 12:56     標題: 轉帖：有關侵大學生要求老闆明哥贊助事件

《字裡行奸》

今日瘋傳既一件事，令我好糾結，我地香港既文化幾時扭曲到呢個地步？

浸大事件，因為贊助既事，令一班大學生被冠上十萬不赦既罪名，以我角度，係無稽甚至係唔應該發生。

一班大學生，因為某個學會活動搵贊助，搵到一間老闆好好人既飯店，佢地依程序去同老闆商討，用幫飯店宣傳去換取贊助。

呢一類既贊助我亦都有曾經參與過。

我接觸過一班嶺南既學生，佢地都好似報導入面既浸大學生一樣向我提出贊助計劃，我覺得唔錯，所以同佢地完成左一次合作。

好快，又有另一批學生再去到我既飯店又一次要求我贊助，我因為覺得上一次既效果唔太好，所以拒絕左，班學生禮貌咁向我講一聲再見，然後以後都冇再去搵我。

我想講既係，報導入面既老闆同浸大學生都冇錯，老闆好人我絕對同意，現今社會，已經無幾多人願意用自己多餘既錢去幫其他人眼中多餘既人，呢位老闆既俠義心腸，我覺得絕對需要支持。

但老闆既好，係冇必要放大浸大學生既錯去彰顯，去成就。

呢班莘莘學子，都只不過係用正途手法去要求某一種贊助，佢地冇偷冇搶冇呃，甚至係禮貌周周咁向老闆商討合作既細則，到底係乜嘢原因令佢地蒙上咁大既罪名？

有人話佢地一而再，再而三咁向老闆要求贊助。但我關注係，係點解老闆如果唔願意，點解唔開口拒絕呢一班浸大學生？

報導入面好偏頗咁用「老闆好好人，唔識拒絕人」呢個原因，去妖魔化一班浸大學生，形容佢地一次又一次咁去欺負呢一位唔識拒絕人既老闆，令到整件事既對立面更加透徹。

睇到呢位執筆既朋友，我覺得好氣餒，我地香港既風氣，係咪要去到大家如果分析一件事之前，入場前就要拎定武器，揀定正負區，大戰一開，兩邊就互相攻擊，不死不休？

老闆好好人，唔識得拒絕，如果呢位老闆喺香港呢個地方做生意而唔識拒絕，佢失去既點止會係三文治同飯盒？

呢一種表述既手法，就好似某一類時下娛樂雜誌咁，求Focus、求話題、求效果，

但佢地已經失去左報導既最初目的 - 求真。

後來學生作出既道歉已經係後話，我怕既係，喺香港時下流行既速食文化風氣之下，會愈來愈多呢類既文章去製造不同既對立面，引起更大既牽連，甚至係紛爭。

好怕我地以後見到既文章都已經唔係求真，而係吸Like，又或者係吸晴。

---

歡迎光臨 戰略要地 (http://urbase.net/bbs2/)

Powered by Discuz! 7.2